تكنولولجيا الكذب..مع الاعتزار للكذب التقليدى

...... انا فى عربية طنطا ...يلا عايزين حاجة" دة كان واحد بيكلم حد فىالموبيل و طبعا احنا مش عربية طنطا ولا حاجة احنا كنا عند منزل ميدان لبنان !!! عادى مثلا تلاقى حد بيقول اية " انا داخل اهووو على رمسيس " بس احنا بنكون عند الكارتة.
" الووووو ايوة يارمضان انا فى إشارة رمسيس اقطع التذاكر و انا قدامى 10 دقايق و اكون فى المحطة" و الظريف ان احنا بنكون عند مدخل 6 اكتوبر!!!!!!!!!!! بعد شوية رمضان قطع التذاكر " الوووو ايوة انت قطعت ..يخرب بيتك انا لسة فى إشارة رمسيس .. اية اللى خلاك تقطع ....و" وبيكمل خناق معاة, مش انت اللى قولت لة يقطع و انت فى رمسيس .. غريب قوى رمضان دة!!!!
وهكذا ...الناس بتتكلم فى الموبيل و كتير قوى بيقولوا حاجات كومديا غير الحقيقة خالص مع ان القصة ماتستهلش التلفيق دة كلة ..يعنى انت لومتأخر ممكون تقول دة بشكل كويس مش زى اللى حصل لرمضان !! ودة مش عشان الناس اللى حواليك سامعين انت بتقول اية , انما على الاقل ما نستشهلش الكدب و الاستخفاف بعقلية اللى بيكلمك لانك ممكن تكون مكانة وحد يضحك عليك كدة بالظبط.
المهم دة موقف حصل معايا و كنت راكبة جنب السواق و من مكالمتين موبيل اكتشفت انة متجوز اتنين او بيحب واحدة و بثبت مراتة ازاى بقى " الوووو ايوة يا سيد ..واللة لسة خارج من العباسية و اتعيشيت ..ايوة عند القمر.. القمر الجديد ..ماشى خلاص سلام عليكو" وبعد شوية رن الموبيل ووشة اتقلب وشكلة مش عايز يرد بس لازم .. " الووو ايوة انا لسة خارج من الميدان .. لا انا اتعشيت نامى انتى انا هااتأخر..يلا بقى الشبكة ساقطة و مش سامع" وقفا السكة
لا تعليق مش كدة
الحمدللة على الموبيلات و بصراحة اصل احنا كنا ناقصين

ولوكان الجو بتاعى اتأخر كدة دة كنت موتة دا إذا استنيتة اصلا

كنت فى موقف العربيات واقفة مستنية صحبتى اللى بتسافر معايا كل يوم الصبح وعايزة احكى لكم على الكوميديا الاجتماعية اللى بتحصل لما بكون مستنية فى موقف العربيات. كل السواقين لازم يسألونى مجموعة كدة من الاسئلة " انتى مسافرة يا ابلة..رمسيس ولا جيزة..اكتوبر" برد بكل زوق " لا شكرا" بعد دقيتين كدة تلاقى سواق تانى "تعالى يا ابلة العربية دى عايزة نفر واحد "بس" و بكمل بكل زوق"لا شكرا

وبعد خمس دقايق بتصل بصحبتى عشان استعجلها ."يلا بقى تعالى الدنيا زحمة و مش عارفة اقف.. و هى بتقولى واللة العظيم قدامى دقتين و اوصل و بعدين انتى اقفى فى حتة فاضية عقبال ما اوصل" وعايزة اقول لكم حاجة ظريفة قوى, انا فعلا بكون و اقفة فى حتة فاضية بس بقدرة قادر تلاقى ناس جات حواليك و المكان ما بقى فية بشر زى النمل و كلهم عايزين يستنوا فى نفس المكان ...اتحرك شمال او يمين برضوا يروحوا ويجوا معاك مافيش فايدة. و تعليقات بقى " واللة معندوش دم اللى يلطع العسل دة " "اكيد هايجى ياجميل ولو مجاش انا موجود" . دة طبعا فاكرنى مستنى الجو بتاعى مايعرفوش انى مستنية صحبتى .لان هو عندنا ارتباط شرطى ان اى واحدة مستنية فى الشارع طبعا بتكون مستنية الواد بتاعها. ولو بتتكلم فى الموبيل طبعا بتكون بتستعجلة .

المهم صحبتى اتصلت و قالت لى تعالى من الناحية التانية عشان اقرب انا وصلت ..قلت لها لا تعالى عشان الناس تشوفك و تعرفك و يطمنوا على ....انا عارفة انى مش اول واحدة طبعا يحصل لها كدة, بس الغريب انة بقى عادى انة يحصل او بقيت مسلمات فى حياتنا..عادى بقى.

رمسيس ب 10 جنية و ممنموع التدخين يا حضرات

دى اخر حاجة بتسمعها قبل الميكروباص ما يتحرك من موقف العربيات الى طريق القاهرة "رمسيس بــ10 جنية و ممنوع التدخين ياحضرات", وبيقولها الراجل اللى بينادى فى الموقف و بعدها بيركب السواق. لحد اللحظة دى بيكون الجو هادى نسبيا الهدؤء الذى يسبق العاصفة كالتالى...واحد من الركاب يكون ماسافرش من حوالى 3 او 4 شهور و طبعا اتفاجأ بالاجرة و يبدا يصرخ فى الركاب كلهم"...اية10اية بتقول 10 جنية لية كانت اخر مرة بــ7 جنية بس يا اسطى ..يا اسطى وطبعا السواق مش بيرد ...و يبدأ واحد تانى فى الصراخ..واللة دة حرام هى تبقى بـــ9 كويس عشان احنا لسة هانخد مواصلة تانية!! و بيستمر السواق فى تجاهلة للمناقشة دى تماما. وكأن الموضوع دة مش بتاعة اصلا. وماخبيش عليكم انا فى الغالب مش بتكلم او اتدخل فى المناقشة دى, لانى عندى رأى ممكن يكون بيزعل الناس شوية, و هو ان المكان الرسمى المخصص للعربيات المكيروباص هو موقف المنيب وفى الحالة دى هاتدفع الاجرة اللى هى 7 جنية من الفيوم لحد المنيب. انما فعلينا فى عربيات بتقدر تقف فى ميدان الجيزة و رميسيس و كمان عند ميدان الرماية ودة طبعا مش ببلاش انما السواقيين بيدفعوا ما يسمى بـ "الارضية" بمعنى اكرامية او بدل واقفة يعنى و مشى نفسك وكدة. و بالتالى بتزيد الاجرة لان السواق بيحسبها ازاى, انة بيدفع دلوقتى, البنزين وصيانة للعربية والكارتة وكمان الارضية. و دة بقى بيت القصيد , احنا رضينا الطريق السهل اللى ها يوصلنالاقرب مكان عاوزينة ..مثلا سلم السودان -ميدان لبنان او الزمالك و هكذا. او شارع الهرم و الجامعة من ناحية تانية .. وهكذا تلاقى نفسك فى دائرة من الحقوق والمتطلبات مالهاش نهاية..........يووووو. انا اتأخرت عليكم و نسيت اقول لكم اخبار الخناقة اللى شغالة من بدرى وصلت لحد فين.. و خلينى اقول لكم ان فى النهاية ممكن تكون فى اتجاة من اتنين, الاول ان مجموعة المعترضين بتنزل و تسيب العربية و دة مش قليل بيحصل و الاتجاة التانى انهم بيرضوا و يدفعوا الــ10 جنية و هما متضايقيين. و فى النهاية بقول للمتضايقيين دول لو ممكن تروح المنيب ماشى اية المانع لكن لواحنا بناخد خدمات مانزعلش من الدفع بقى طالما احنا موافقين علية. نسيت اقول لكم حاجة كمان ان دلوقتى السواق بقى بيحط نصيب الراكب فى دفع غرامات المرور على الاجرة ويلا انشلا ما حد حوش .. .

Added Value

النهاردة انا مش هاتكلم عن الحوارات الغريبة اللى بقابلها كل يوم فى رحلة الصباح و المساء. انما المرة دى كنت فى رحلة فى طريقى للبحث عن اصدقاء وهو طريق بردوا مليان بحاجات غريبة جدا . واكيد طبعا قليل قوى من الناس اللى يقدروا يضيفوا قيمة فى حياتنا عشان كدة انا عايزة ابعت شكر كبير جدا لانسان عزيز على قوى قوى, وبرغم ان احنا نعرف بعض من فترة صغيرة الا انة اضاف معانى جميلة و قيمة كبيرة للكلمات بتاعتى البسيطة ودة اللى حصل ....انة بعد ما قرا المواقف اللى بتقابلنى فى سكة سفر.....قال لى " انتى ممكن تضيفى اغنية قريبة توصف المواقف دى" بس طبعا انا خبراتى فى التكنولوجيا مش كبيرة . ولان هو حد شاطر قوى و كمان متخصص فى قصة التكنولوجيا دى فكان لة الفضل فى انة يضيف الاغنية اللى انتوا بتسمعوها دلوقتى.

مبسوطة قوى ان لسة في بشر بقابلهم ممكن يأثروا فى حياتى بالايجاب وهاكون مبسوطة اكتر لما يكون دايما موجود بيلفت نظرى للافضل و كمان بيساعدنى اوصل لية. وبتمنى انى اقدر اضيف قيمة انا كمان.

رغم انك رفضت اضافة اسمك فى البروفيل بس انا دايما هافضل مدينة لك بالاضافة دى

الاولى والتانية

الساعة تقريبا 8.30 صباحا و بالتحديد بيكون الميكروباص وصل عند منزل ميدان لبنان من على الطريق الدائرى. ودى بداية الحوار اللى بيحصل يوميا بين السواقين و بعضهم فى الموبيل" الوووووو ايوة انت فاااا .. و بيكمل انا فى النزلة الاولنية وانت واقف فاااا ؟؟ انا مش عارف انزل النزلة الاولنية و انزل النزلة التانية ؟؟ انت شوف الظابط فااا فى التانية و لا اةةة؟؟ طيب بص انا هانزل من التانية باين علية واقف فى النزلة الاولنية" و بينتهى الحوار بين السواقين على الموبيل و بعد ما بننزل الحمد للة على حسب مرة من الاولى و مرة من التانية بيحصل اتصال تانى " الووووو ايوة انت فااااا انا نزلت من التانية و الظابط واقف فى الاولنية بص بقى انزل و خلاص ربنا يستر "
و طبعا بنفضل انا وصحبتى نضحك على الحوار الجامد دة كل يوم و السبب طبعا ان سواقين الميكروباص بيتجنبوا لجان المرور اللى مجنناهم و بيطلعوا جنانهم على الركاب طبعا.
و انا بتمنى ان شركات التليفون المحمول تعمل خط خاص لاستقبال حوارت السواقين بخصوص لجان المرور و اكيد الشركات دى هاتبقى كسبانة لان الحوار دة بيحصل فى جميع ساعات النهار و الليل مرة فى الهرم وهما بيسألوا على القوات سريعة الانتشار واقفة عند شارع العريش و لا اية الاخبار و اية مولد وصاحبة غايب و طبعا الميكروباص بيفضل هايم فى شوارع القاهرة الواسعة الفاضية الهادية علشان يوصل بالسلامة بيكون الركاب نسيوا هما جايين لية اصلا
وربنا يخلى لنا الادارة العامة للمرور