Pages

Saturday, November 15, 2008

الاسعاف الطائر والنهرى


المرة دى وانا فى الطريق و تحديدا فى شارع البحر الاعظم, شفت حاجة غريبة يافتة مكتوب عليها " مركز الاسعاف الطائر و النهرى" مركز الأسعاف سواء بالبحر او بالجو .بجملة الغرائب و الطرائف اللى انا بقابلها فى مشوار بلدى اللى بشوف فيها حاجات مش قادرة اقول انها غريبة بس ياترى دى حاجات حقيقية . نفسى اصدق ان فى حد خايف على الناس وممكن يكون بيفكر فى مصلحتهم و صحة الغلابة اللى معندهمش بس كل ذنبهم انهم موجودين فى بلدى

Friday, October 24, 2008

مجرد افيش

من زمان و انا دايما بسمع ان السينما هى مرأة المجتمع , بمعنى ابسط ان افلام السينما بتعكس الحالة اللى فيها المجتمع بتاعنا. مرة وانا مسافرة كالعادة بيكون عندى وقت افكر و أتأمل فى الاحداث اللى حوالينا لفت نظرى اسم فيلم جديد. " البلد دى فيها حكومة" ودة اول افيش لفيلم يتناول الكلمة الدارجة اللى الناس الغلابة دايما بيقولها لما يتعرضوا لموقف امام جبروت الفساد . وكأنهم بستنجدوا بيها ...وكتير قوى بنكون عارفين فى داخل انفسنا ان هذا الصوت الضعيف بعيد قوى قوى وتقريبا مش بيوصل للـــــــــــــــــــــــــحكــــــــــــــــــــــــــــومــــــــــــــــــــــــــــــــــــــــة. وفكرتنى بالبطل اللى كان بيجى فى الافلام القديمة اللى كان بيتصدى للبلطجية و هو بيقول "ياعدوى" هى مناجاة بين الانسان و ربة ممكن تديلة بعض الحماسة المعنوية لكن مش دايما بديلة الحماسة المادية المطلوبة لمواجهة الموقف فى الواقع. وخايفة اقول ان احنا فى بلدى بقينا بتكلم كتير و نتحمس على المستوى المعنوى , بقى عندنا حرية تعبير عن المطبات اللى موجودة فى المجتمع . لكن للاسف بنقف عند كدة و بس لكن ماذا بعد؟؟؟؟؟ سؤال دايما من غير جواب

Wednesday, October 22, 2008

اختراعات مصرى

احنا عارفين طبعا ان الانسان المصرى دايما صاحب الاكتشافات و الرائد فى اختراع حاجات غريبة جدا .. نظرا لان الظروف اللى حولية بتساعدة على الاختراع و الابتكار.. ايوة بجد مش تهريج .. احنا بندور على الحلول اللى ممكن تسهل علينا حياتنا فى الوقت اللى الحكومة بتصعبها علينا. و انا راجعة النهاردة البيت اخدت المكيروباص من ميدان الجيزة ..عادى دافعين ارضية و اقفين فى الميدان ما فيش مشكلة!!!! السواق اخد طريق محور المنيب لكنة مانزلش نزلة المريوطية و المنصورية كالعادة عشان نوصل لميدان الرماية و منها اول طريق الفيوم الصحراوى.. انما مشى من طريق غريب جدا فاجأة نزل من طريق اسمة الدبابة.. معرفش لية سموة كدة و هو عبارة عن مدق وسط الجبل فى الغالب بيلف من ورا الاهرامات .. طولة حوالى 20 كم وطريق غير ممهد للسير فية انما مجرد مدق فى الجبل, و الغريب ان انى افتكرت ان بس سواقين المكيروباص هما بس اللى بيمشوا فى الطرق الغريبة دى بس انا لقيت ان كل العربيات ماشية منة , و لما الناس سألت السواق اية ياعم الطريق دة ؟؟ رد الراجل وقال " ان الطريق دة مافيهوش لجان مرور و اربط الحزام ولا فك الحزام و الكلام دة.. وكمان بعيد عن الزحمة بتاعت شارع الهرم و فيصل و ميدان الرماية" ودة لان اى حد عندة عربية دلوقتى حاسس ان قانون المرور دة مش لان الحكومة خايفة علينا لا سمح اللة انما عشان تنتقم من كل واحد خارج يدور على اكل عيشة و تكفرة و تخلية يندم انة خرج من بيتهم اصلا. وانتهى الكلام على كدة,
الناس فى بلدى اخترعوا من تلقاء نفسهم طرق تساعدهم على الخروج من الازمات بس بطريقتهم . وعجب

Thursday, August 7, 2008

اروح على فين؟؟


كنت عايزة انام بشكل جامد جدا ... هو دة الاحساس اللى كان مسيطر على اثناء رحلة العودة مرة من القاهرة , حسيت انا عنيى عايزة تغمض .. وتحديدا لما كان صوت ام كلثوم بتغنى فى الكاسيت بناع العربية و بتقول" وصفولى الصبر لقيت كلام وكلام فى الحب يدوب يتقال.. اهرب من قلبى اروح على فين لييلينا الحلوة فى كل مكان.. ملينها حب احنا الاثنين... وملينا الدنيا امل.. امل وحياة " ياسلام الكلام جميل قوى حقيقى كلام منطقى جدا .. لما تشوف اللى بيحبة فى كل الدنيا اللى حواليك يعنى هاتهرب هاتروح فين؟؟ ولية الداعى للهروب من اصلة.. يا عينى يا ست واللى خلانى عايزة اغمض بشدة ان الهواء البارد كان بيحرك حصلة من شعرى ..هواء نقى لان بعيد عن العوادم و الخنقة ...وكمان انا مرتاحة فى الطريق النهاردة , لانى كنت فى الكرسى الاول و مكنش فية حد جنبى..يعنى جو رومنتيكى ع الاخر." يا عينى ع العاشقين ع الصبر مش قادرين .. دا الصبر عايز صبر لوحدة ..مقدرتش اصبر يوم على بعدة مقدرش على بعد حبيبى .. انا لى مين اللى حبيبى "يا سلام يا ست اية الوصف الجميل دة .. الصبر عايز صبر لوحدة. ما فيش بلاغة اكتر من كدة.

Monday, June 23, 2008

حمدللة ع السلامة

احنا هنا فى منطقة اسمها دهشور وفى المكان دة بالتحديد فى كلمة لازم سواق المكيروباص يقولها " حمدللة ع السلامة ياحضرات" وطبعا هو لا يقصد المعنى الحرفى بتاعها حمد للة ع السلامة لان احن لسة بنا و بين محافظة 6 اكتوبر 10 دقائق وانما بيقصد ان احنا وصلنا و يلا بقى الاجرة و الا اية؟؟؟ و بالظبط بعد ما بعدى شريط السكة الحديد .. وهو خاص بنقل معدات و بضائع بس .
من الشباك هتلاقى حواليك منطقة دهشور و دى منطقة كلها عسكرية لان فيها قطاع الجيش و غالبا فيها مطار حربى بس هى مشهورة بالجيش اكثر و كمان المجندين اللى فى مرحلة التجنيد بيبقوا عارفين مدقات فى الجبل عشان يعرفوا يرجعوا لما الواحد منهم يتأخر عن معاد العودة. وكمان 5 دقائق و تبدأ تشوف اللو الاخضر , و مدخل اكتوبر وفى الاثناء دى طيعا بيكون كل الحوار اللى فى العربية ع الاجرة و اللى لية باقى .. و اللى لسة بسأل" هى الاجرة كام يا اسطى" واللى مطنش وعامل نايم , واللى عايز يدفع اقل ... وكدة يعنى والظريف ان الناس اللى مش عارفة المكان بالظبط اللى هاتنزل فية تبدأ تسال السواق " عايزين ننزل التحرير لو سمحت!!" و السواق يقول فى حسرة " احنا فين و التحرير فين يا عم!!" ليسة بدرى " ويعدين اللى عايو ينزل فى مكان يقول علية من بدرى و بصوت عالى .. ايوة خلينا كويسين كدة مع بعض"
مش كدة و لا اية

Friday, May 30, 2008

الكيلو 60

احنا هنا بقى فى منطة الضغط العالى و اسمها كدة عشان فيها محطات ارسال و شبكات وهنا بقى فات من زمن الرحلة بتاعتنا 40 دقيقة تقريبا وخلو بالكوا المكان دة مش مكان كدة والسلام فى الطريق .. ولازم نربط حزام الامان , و لمدة 15 دقيقة .. فانت فى منطقة المزاج كلة... هنا بقى انت فى وسط الصحراء و قدامك مسافة لحد ما توصل للقاهرة و كمان تقدر تبضع وتشترى .. ياترى ممكن تشترى اية وانت فى مكان صحراوى كدة ... مش هاحيركوا كتير !!! هنا وطول ما انت راكب عربيتك تقدر تشوف بكل وضوح و من غير مجهود ناس بتبيع و تشترى كل انواع المخدرات .... ايوة مخدرات والزباين اية بقى راكبين عربيات اخر موديل ومش لازم كمان يكون معاك عربية مخصوص عشان تروح هناك .. لا طبعا شعارنا " ان الدعم يصل لمستحقية".
ناس كتير جدا بتروح بالموصلات العامة و تنزل فى وسط الصحراء عن منطقة الضغط العالى او الارسال . والظريف جدا ان مرة وانا راجعة للفيوم ركبت ميكروباص والتباع كان بينادى ع الركاب وهو بيقول ..
" فيوم فيوم و كمان الكيلو 60 اللى عايز " وسألت اية دة الكيلو ستين؟؟ وقلت فى سرى اكيد هانعرف .. عارفين اية هو الكيلو 60 دة دى محطة الضغط العالى لانها بتبعد عن القاهرة بـــــ 60 كيلو !!! محطة كل الناس اللى بتسافر عارفها بالاسم !!
مرات كتيرة بيركب معايا ناس و بتنزل هناك .. بكل بجاحة كدة و فى عز الظهر والدنيا نور عينى عينك .. واللة على رأى مصطفى كامل " لو لم اكن مصريا لوددت ان اكون مصريا" احنا فى بلد الحريات والناس بتركب موصلات عامة عشان تشترى مخدرات اية الجمال دة .
مرة ركبت المكيروباص و بعدين عند الارسال والركاب كلها نزلت ماعدا 4 بس.. السائق بص للركاب اللى فضلوا فى استغراب.. وبعدها كل الناس فضلت تضحك على الموقف دة يعنى المكيروباص عدد ركابة 14 راكب , ينزل عشرة عند الارسال ..كوميديا .

واخر مرة دى كانت من يومين وارنا راجعة الفيوم و ركب واحد شكلة مش مريح .. المهم قال للسائق انا هانزل فى الطريق .. فطبعا كل الركاب فهمت ان من الزباين بتوع الجبل .. المهم و عند مدخل 6اكتوبر كان فية كمين كالعادة ولا ليهم اى لازمة بس الراجل دة طلع كيس من جيبة و حطة تحت الكرسى اللى هو قاعد علية .. و بعد ما عدينا من الكمين بشوية واطمن ان ما فيش حد شايفة راح اخد الكيس و حطة فى جيبة تانى .. عارفين اية؟ الكيس كان فية بودرا و هو خاف فى الكمين لحد يكشفة فقال يحطةتحت الكرسى ولو حد شك فبة ساعتها يقول دة مش بتاعى!!!! و لما اطمن ان الكمين نايم فى العسل الاسود .. اخذ الكيس وطبعا وصل بالسلامة لمستحقية من زباين الجبل.
صعبان على يا بلدى .. مش انت اللى قال عنك عبد الحليم " بلدنا واقفة ع الترعة بتغسل شعرها ..جاها نهار مقدرش يدفع مهرها"ولا مش انتى, ولو مش انتى هاتكونى مين؟؟

Friday, May 16, 2008

محطة تحصيل الرسوم

وفى المكان دة ... محطة تحصيل الرسوم و بالعامية يعنى الكارتة... و فيها بيتم تحصيل رسوم استخدام الطريق .. ودايما بسأل نفسى هى اية لازمة الرسوم دى؟؟؟ و دايما بتيجى الاجابة عشان الخدمات اللى موجودة على الطريق!!! و طبعا فى الموضوع دة فدث و لا حرج لان طبعا الطريق مليان بالخدمات التى لا تعد و لا تحصى :( و انت مش اغراب طبعا . و الظريف ان هيئة النقل موضحين على لوحة كبيرة قبل المحطة بحوالى 2 متر اسعار الرسوم المستحقة حسب نوع العربية ..نقل او ملاكى او اجرة وهكذا. و كمان فى حارة مخصوص لرجال الشرطة و الجيش عشان هما معفيين من الرسوم !!!! مش عارفة لية ؟؟ يمكن مش بيستفادوا بالخدمات الهايلة اللى ع الطريق ولا هما بيخدموا البلد و الناس التانية لا!! و طبعا لازم يظهر بطاقة إثبات الشخصية للمحصل عشان يعدى من غير دفع . و عشان المصرين دمهم خفيف و اصحاب حيل و نكتة.. فكثير قوى بيحاولوا يعدوا من غير رسوم فيعمل انة من رجال الدولة و يظهر كارت ميناتيل او اى كارنية وطبعا المحصل يقف من مكانة بسرعة و يقول " مع السلامة ياباشا" مسكين من كتر الشمس اللى هو موجود فيها طول النهار مش بيبقى عارف الكارنية من الابونية ..ورغم كدة فى مرة كنا معدين بالميكروباص و اثناء ما كانالسائق بيدفع الرسوم بصيت ليت العسكرى بتاع الشرطة العسكرية موقف عربية ملاكى و منتظر و بيحقق فى الكارنية اللى الراجل اللى العربيةالملاكى طلعة عى انة من رجال الجيش المعفين .. والراجل عمال يدور فجيوبة و العسكرى مستنية و مش عايز يفتحلة الطريق لحد ما يتحقق من بطاقتة .. و لا ن اخينا دة كان معاة كارت الميناتيل ... فالعسكرى تقريبا قالة لازم تعدى من البوابات و تدفع و مافيش داعى الحركات دى ..بصراحة موقف العسكرى كان رائع جدا لان رفض عبور العربية و اصر على ان يتحقق من الكارنية بجد. المهم انيفضل على كدة.

Saturday, May 10, 2008

كوم اوشيم

ودى بقى نقطة التفتيش اللى بنعدى عليها اثناء الرحلة اليومية فى الذهاب و الاياب... وهى بتبعد عن الفيوم بحوالى 20كم و فيها بعض المزارع لكن هى بداية الطريق الصحراوى و اهم حاجة فى نقطة التفتيش دى انها فيها كشك صغير بيحصلوا فية الابونية اللى السواق بيطلع بية من الموقف ..لكن الظريف ان لو السواقدة معاة و كيل نيابة و لاظابط طبعا مش بيقف و لا يقدر اى حد اصلا يقلة فين رسم الخروج من الموقف واضح طبعا . و الاهمية الثانية للنقطة دى هى ان فيها قسم لتامين الافواج السياحية اللى بتدخل و تخرج من الفيوم اللى بتيجى تزور وادى الريان ووادى حيتان وتونس و الاماكن الاثرية و كالعادة بيكونوا شوية عساكر تعبانين ومعاهم ظابط او اثنين والمهم انهم بأمنوا الافواج السياحية .
وفى مرة اثناء العودة من شغلى وكانت حاولى الساعة السابعة مساءٍ و اثناء مرور الميكروباص من كوم اوشيم قام الظابط بأيقاف الميكروباص و سأل الناس عن البطايق بتاعتهم, طبعا اختار من الركاب بشكل عشوائى. المهم نزل حوالى اربع رجالة منهم واحد كان راكب و معاة مراتة و هو دة وبأختصار هاقول لكم ان من ضمن مهام نتطة التفتيش دى انها بتابع المتهربين من الاحكام او الخدمة العسكرية ,عن طريق الكمبيوتر بالكشف على الرقم القومى . ثلاثة من اللى اخذوا بطايقهم رجعوا الا واحد منهم اللى كان معاة مراتة .. و غاب وطولت المدة فى انتظار الراجل و مراتة قلقت علية و بقت الساعة حوالى ثمانية و زيادة, المهم مراتة نزلت و الناس تهدى فيها و هى هاتتجنن عايزة تعرف اية اللى حصل لجوزها؟؟ والناس تتطمنها طلما انة مش علية احكام متخافيش دى اجراءات روتنية. المهم الراجل رجع و هو وشة اصفرو باين علية انة عامل عملة.. عارفين اية هى !!! طلع انة متجوز على مراتة و مخبى عليها و مراتة الثانية رفعت علية قضية تبديد قايمة وهو مش عارف وطبعا لما كشفوا على بطاقتة طلع انة علية حكم وهو متهرب منة. ودة كانت النهاية ...مراتة لما عرفت... نزلت فية ضرب و شتايم و هو يهدى فيها و الناس ومافيش فايدة وراسها والف سيف ان سواق الميكروباص يسيبوا فىالصحراء هنا وان العساكر يمسكوة ..

Friday, May 9, 2008

ميكروباص

كل يوم تقريبا بسافر حوالى اربع ساعات هى اجمالى المسافة من بتنا حتى مكان شغلى , و العودة المهم خلال المدة دى بقابل ناس كتيرة جدا واصناف و الوان من البشر كلهم بتكلموا وبيحكوا فى كل حاجة فى حياتهم ..الناس بتستغل فترة الموصلات بشكل غريب جدا .. فى الحكاوى بصوت عالى جدا و المفروض انى لازم اسمعهم غصب عنى .. واللى بينام من كتر التعب ..وباشوف حاجات اغرب.. عشان كدة لقيت انى قدام فيلم سنما والعرض مستمر ...ولقيتنى بعيش فى بلد و بشتغل فى بلد تانى وفى الاربع ساعات دول بحس ان انا فى خمس بلاد!!!! كوميديا و تراجيديا على الاخر.. ولكنى قررت ان استفاد من سكة السفر وماتبقاش وقت ضايع و السلام.
دة اصل القصة و سكة السفر ,لانى فى نفس الوقت متأكدة ان حياتى فيها محطات كتيرة زى كتير من الناس .. يمكن مش مؤثرة فى الكون ولا بتغير الموازين . لكن بالنسبة لى كان مهم اقف وانا فى الطريق عشان اعرف انا فين و الخطو اللى جاية هاتكون اية؟؟