الفقر فى الوطن غربة والغنى فى الغربة وطن

كتير بسال نفسى هو احنا دولة فقيرة ؟! او بمعنى تانى اللى بيقول عليها نامية ؟ الكلمة دى انا بسمعها من 25 سنة ان مصر من الدول النامية . وبالبلدى كدة فقيرة .. بس كان دايما جواى سؤال هو الدول الفقيرة دة بيكون عندها فقر فى الموارد مثلا .. يعنى معندهاش نهر كبير زى نهر النيل ؟ او معندهاش موارد بشرية كتير ؟ وفى الغالب معندهاش علماء بيفكروا؟ طيب لو بلد عندها كل دة تبقى فقيرة .. ولا مش؟
ومرات كتير بتقابل مع مواقف بتخلى فكرة بلد الفقرا دايما قدامى,
مرة صحبتى قالت لى على حوار كان حصل فى الطريق على لسان راجل غلبان بيشكى همة للى قاعد جنبة فى الميكروباص ولانها عارفة انى مهتمة بتجميع الحكايات اللى بصادفنى فى سكة السفر فجات حكت لى الحوار اللى كان بيقولة "الدنيا بقى حالها مقلوب..و الحالة زى الزفت..و اللة يا استاذ انا بجيب الدوا لابنى الصغير الشريط فية حبيتين بـــ100 جنية ..اوة واللة..لما خلاص مش عارف اعمل اية؟؟" "عيشة هباب" والراجل التانى بيرد علية" الصبر ان شاء اللة ربنا يهديك للصبر والثبات ويكتبلك الجنة و يتقل ميزان حسناتك" ..ويكمل الغلبان شكوتة"الصبر..احنا مش لاقين اللقمة وبردوا بنقول الحمدللة..ماقدمناش غيرة نشتكى لة..." وبعد صمت لمدة ثوانى غالبا الراجل الغلبان فكر فى كلام الراجل التانى وراح كمل وقال واللة ياريت الواحد يموت و يستريح حتى اللى مش معاة دلوقتى هايكون معاة فى الاخرة...و بعد راح مكمل بس انا مش ضامن انى هادخل الجنة.. يعنى فى الدنيا عذاب من المناظر اللى بنشوفها واللى راكب عربية و اللى بياكل لحمة كل يوم و بيصرف شمال و يمين و كمان مش اكيد هانتمتع فى الاخرة.....طيب دا كدة ....ربنا ضحك علينا ولا اية؟؟
"احنا اضحك علينا" دى كانت العبارة اللى الراجل فضل يقولها و طبعا اخينا التانى مردش علية خالص.
وفضل يتكلم" هو احنا ربنا هايحاسبنا بنفس الميزان اللى هايحاسب بية الناس الاغنياء؟؟؟" انا اتصدمت بعد ما سمعت الراجل دة بيقول كدة
فعلا الفقر عمل منا اغراب فى بلدنا..الفقر خلا الشباب تركب مراكب الموت و تسمع منهم اللى بيقول " لوعشت هاجيب رزق لاهلى و لو مت يبقى اوسع مكانى فى البيت لاخواتى" معقول فى كدة فقر

فقر العقــــــــــــــــــــل وفقر الجيـــــــــــــــــــــــب

من خلال شغلى كانت عندى فرصة اشوف فيها المجتمع بتاعتنا من قرب قوى . و المقصود باشوف المجتمع مش ميدان التحرير او ميدان الجيزة و لاحتى المحافظات الكبيرة . انما القرى و المراكز الى بنقول عليها "وتوابعها" لما بنتكلم على محافظة ما مثلا.

والحكاية بتتلخص ان فى بعض الاحيان بننزل نقيس مدى نجاح مشروع على ارض الواقع و لان المصرين اساتذة فى البيانات والارقام و خلافة فا دايما بنبعد عن اللإحصائيات تماما ....لكن بنقيس مدى رضا الناس, بنسأل الناس بشكل مباشر دون الرجوع لقواعد البيانات.

وفى جمعية تنمية مجتمع فى مركز من المراكز التابعة للجيزة كان لينا لقاء مع الناس فى القرية دى. و الحوار بيكون بسيط قوى من غير كلمات كبيرة وكدة... .والاجابة كانت عايزين مخبز عيش ومية شروب نظيفة!!طبعا مش محاتجين نعرف هو السئوال كان اية!!! وبكرة بالنسبة لكم هو اية؟ " بكرة يعنى نكسب لقمة عشنا ونلبس هدمة نظيفة و العيال تبقى مبسوطة"

هو دة كل اللى الناس عايزاة فى قرى مصر كل طموحهم "لقمة العيش" مش معقول فى اى بلد فى الدنيا مسئولية الحكومة اللى فيها هى توفير البنية التحتية والاساسية للناس بالاضافة الى توفير الخدمات الاساسية بشكل محترم مناسب للبشرية. مافيش تعليق غير ان الناس بتفكر مكان الحكومة ..الناس معندهمش مساحة يفكروا فيها فى حياتهم ..الفقر عندنا بقى فقر العقل ..و هو اشد بكتير من فقر الجيب وعلى راى اللى قال ..هو البنى ادام اية غير عقل و شوية حاجات فوق بعضيها !!!

MP3

ما نقدرش ننكر ان فى موجة من الاغانى المعبرة جدا قصدى الغريبة قوى قوى و اسفة فى التعبير لو قلت المنحطة جدا جدا مش عارفة اية العلاقة بين الموصلات العامة و الاغانى الهابطة؟؟؟

كالعادة بعد ما المكروباص بيتحرك لازم السواق يشغل الكاست ..و يا ويلة يا سواد ليلة اللى حظة يجى مع سواق بيحب الاغانى الحماسية اللى بتتكلم عن احوال الدنيا بس بطريقة مش ممكن اى كلمات توصفها و مثلا عمرك سمعت اغنية " محكمة" اللى فيها المطرب بيحكى عن قاعة المحكمة و ازاى ان الناس بتسرق عشان تجوز بناتها و تقتل عشان لقمة العيش....ودة غير صوت المطرب اللى يخلى طبلة ودنك تذن تذن تذن و تسمع هلاوس غريبة نتيجة التوزيع الرائع و المؤثرات الصوتية اللى تهبل. ولا اغنية "مزاجو" ودة مشهورة قوى لانها بتتكلم عن البانجو والسجائر و كمان الاغنية الرائعة "اة يانا تعبانة" ودى فيها عيل صغير بيتكلم عن لبس البنات و الستات اللى بيتعب الشباب و الرجالة ..بصراحة موضوعات فوق الممتاز

بس لسة السؤال دة من غير اجابة واضحة لية دايما سواق المكيروباص بيسمع الكلمات دة؟؟و هو فى غاية الانشكاح و الامبساط؟؟

وفى بعض الاحيان الناس بتصرخ فى السواق"يااسطا شغلنا قران لوسمحت" و دة طبعا اختيار افضل بكتير من الهبل اللى بيكون شغال ولكن للاسف بيكون الرد.."الكاست دة بتاع السواق يا حضرات و مش كل واحد يطلب اللى على مزاجة..واللة اخر زمن دا اية الزباين الغريبة دة" و طبعا بيستمر الطرب الاصيل البشع شغال . وفى سواق بقى معاة ام بى ثرى ..يا بختك بقى لو ركبت معاة...يا خرابى.

و دة حصل معايا...السواق اول ما اتحركنا فضل يقلب فى ام بى ثرى عشان كان بيدور على اغنية معينة و فضل يغير و يسمع و يطلع وينزل بين الاغانى الهايلة اللى تخبل ...تقريبا 45 دقيقة و دة المسافة من ميدان الجيزة لاول طريق المنصورية ..وبعدين هبطت علينا الاغنية اللى هدت الدنيا ..و طبعا مافيش كلام يوصفها . بس الحمد للة انة لقيها عشان يخلى بالة من الطريق و يبطل يلعب فى ام بى ثرى. وفى النهاية الطبيعية بيحصل للسواق طرش و لما الركاب بتقولة عايزين ننزل فى المكان المعين بيكون مش سامع هما عايزين اية و الناس تزعق وهو فى وادى تانى خالص..و لما بيعدى المكان اللى كان عايز حد ينزل فية ...و بيدأ يسمع من بعيــــــــــــــــــد صراخ الركاب ..بيقول اية " فى حد عايز ينزل ..طيب مش بيقول من بدرى لية؟؟ هو كدة ينفع اقف فى وسط الشارع؟؟ ياجماعة كل واحد يخلى بالة مش كدة" طبعا هو هايموت نفسة ولا اية!! .

معدن ولاورق

مع بداية 2008 هلت علينا شكل جديد لبعض فئات العملات المصرية, اشهر عملتين هما الخمسين قرش والجنية واللى بقى شكلهم مختلف من ورق الى معدن . ودة طبعا اللى عمل طفرة فى عالم تداول العملات المصرية ,ازاى لو انت بتدفع الاجرة مثلا و فاضل باقى جنية او اتنين شوفوا بقى المهزلة" لا انا مش باخذ الفلوس الفضية دى.." دة السواق بيقول للركاب "ياسطى مش معانا غيرها يعنى احنا نرميها فى الشارع؟؟؟

وكلاكيت تانى مرة"لا يا اسطا مش عايزين الفضية دى ياعم ماحدش بيرضى ياخدها منا.. لو احنا اديناهالك كنت هاترضى تاخدها؟؟!!" المرة دى الركاب بقى. فى بعض الاحيان يتطور الحوار الى ان واحد من الركاب بيقول للسواق "احنا نروح قسم الشرطة لان فى قانون بيحاسب اللى مايرضاش يتعامل بالفلوس المعدن دة..قلت اية يا اسطا؟ " "واللة انا معنديش مانع بس الفلوس دى مابتمشيش فى الفيوم الجماعة بتاعوت مصر ممكن يستعملوها!! لقيت نفسى بسال بغض النظر عن استعمال الفلوس المعدن او الورق إنما هو احنا محتاجين قانون يحاسب اللى بيمتنع عن استخدام الفلوس المعدن؟؟؟طيب لية؟ او لية كل دة؟؟

وبالمناسبة ممكن يكون المعدن افضل فى بعض الاحيان لان احنا لا نجيد التعامل مع العملات الورقية وبتعانى معانا... يعنى ممكن تنغسل و تنكوى و كدة يعنى. وفى نفس الوقت الناس رافضة تتعامل بالمعدن لانه ماينفعش نغسلها او نكويها عشان كدة الناس مش مرتاحة تتعامل بيها لانها مكلفة..نظرية برضوا ,