اخــــــــــــــــــــــــــــــــــــــــر الخط

النهاردة يوم غريب..او الغربة بقت جوانا عايشة فينا

بس مستنية الموقف اللى يكشفها وما يداريها عمرك جربت الدموع تحاول تخرج من عنيك

لكن تلاقى الف سور..وسور يقولك الدموع تبان ..خليك جامد كدة

عمرك جربت احساس انك مخنوق ..ولما تحاول تقعد لوحد , تلاقى الناس بتقولك ياعم قاعد لوحد لية

عمرك لقيت روحك تاية منك..واتمنيت تسمع صوت ينادى عليك يفكرك انت مين

صوت واحد بس يعرفك انت فى انهى زمن

انت فين..غريبة ..هو انتوا طافيين النور طيب مش تخلوا بالكم من اللى ميعرفش

فين كوبس النور

السكة عتمة ..والطريق طويل والوحدة بقيت زى ريش النسور..بقينا منها وبقينا بنخاف من النور

يا اللى زمان كنت وسط البشر ودلوقتى ماشى بتخبط فى الحجر

مستنى اية ؟ احنا فى الاخر ..والكل نزل وانت مش نازل

الــــــــــــــــــــــــــــــــــــة الزمن

سكة السفر النهاردة كانت سكة سفر مش على طريق عادى .. انما سفر خلال الزمن ..زمن قريب مش بعيد.. لمدة لحظات حسيت انى الزمن وقف بى و الناس مرت من جنبى ..كل حاجة اتغيرت بس انا فضلت زى ما انا فى مكانى.. انا فى اغلب الاحيان بحس انى لسة واقفة فى مكان معين حتى شكلى ما اتغيرش بس دى اول مرة احس فيها ان الناس بترجع للخلف مش بتمشى لاقدام.....من حوالى اسبوعين كدة وانا مسيطر عليا احساس انى فى الة الزمن ...الالة اللى كانت بطلة الافلام الامريكانى ومعناها بإختسار انها جهاز بيستخدم . . عشان يعبر بالزمن للامام او للخلف حسب الاحتياج و اللى مخرج عايزة فى النهاية طبعا . المهم الاحساس اللى مسيطر عليا هو انى عبر بوابة الزمن بعبر بالزمن للخلف ..للقديم يعنى ودة حصللى عشان رحت البلد زيارة عشان موسم الاعياد و كدة ومن ساعتها و انا حاسة انى فى مكان غريب و دة مش عشان ريف او بعيد عن الحضر لالا اطلاقا انا احساسى بالغربة كان مرتبط بتفكير البشر ..وطريقة التعامل مع الحياة و الخبرات اللى بيحكموا بيها .كنت باشوف فى عنيهم سؤال "انتى احسن منا فى اية؟؟ وانتى بتفكرى ازاى كدة و لية؟؟" رغم انى مش متجوزة مثلا ودة طبعا من الكبائر ازاى افضل لحد دلوقتى من غير جواز..بالرغم من كدة كنت باشوف السؤال دة فى عيون الناس..انتى احسن منا فى اية؟؟بالرغم من انك مختلفة بحكم طريقة تفكيرنا لكن احسن !!يعنى هما بسألوا السؤال و بيجاوبوا علية فى نفس الوقت. بس بردوا لسة بيسالوا!!!كنت عايزة اقول انا مقتنعة بفكر معين مش لازم يكون هو الاصح فى المطلق بس انتوا كمان مش لازم تحكموا على الاخرين من منظور فكر معين ثابت الى الابد. بس حسيت انى لو اتكلمت كدة هاكون زى اللى بيتكلم هندى ..هاهاهاهاهاها مع الاعتذار للغة الهندى بمناسبة الهندى عشان البلد دى ليها معزة خاصة عندى...المهم عايزة ارجع ..كل يوم بحاول اتمسك بكل الحاجات اللى بتخلينى عايشة عشان اقدر اقاوم البوابة و ارجع فى الميعاد ..عشان انتوا عارفين لازم ارجع فى ميعاد معين لاحسن اتوة وسط الازمنة المختلفة او افضل هناك ..الفيلم بيقول كدة... اشوفكم فى البوابة اللى جاية

مش ولاد الشوارع

النهاردة و انا راجعة من سفر طويل جدا..و فى اشارة مرور شارع مراد بالتحديد. جات بنوتة صغيرة ووقفت جنب الشباك و مد ايدها عشان نديها اى حاجة. بصراحة انا بكون محتارة بخصوص الناس اللى بتشحت فى الشارع من ناحية بقول ان فى قاعدة دايما اللى محتاج بجد بتكون نفسة عفيفة ومش ممكن يمد ايدة حتى لو مش لاقى ياكل و من التاحية التانية بقول ممكن تكون ظروف الحياة صعبة عليهم و هى اللى دفعتهم لكدة. بس البنوتة دة طفلة فى عمر 7سنين مش اكتر وهزيلة و حافية و حالتهازفت..بصيت لها قوى وهى اخدت بالها وسألتنى.." اية بتبصى لي كدة لية؟..ادينى جنية" وبصراحة انا عيلت معاها و قولتلها.."وهاتعملى بية اية؟؟ قالت من غير ما تفكر ..هاجيب بة شانتوشت..عشان انا جعانة... و صعب جدا انك ترفض تدى طفلة ايا كانت المبادئ اللى بقول عليها ... وهى بتطلب جنية عشان تاكل. و فكرت معقول يا بلدى فيكى اطفال ممكن تشحت عشان تاكل؟؟؟ ولوكل مصرى مقتدر دفع جنية فى الشهر بلاش نقول فى اليوم تفتكروا ممكن نوكل كام طفل؟؟
ولسة بسأل و انا عارفة ان السؤال لغير اللة مذلة (طبعا فى مصر بيكون مذلة المذلة)..... معقول فى بلد كبيرة ولها حضارة ..الخ...
مافيش فى خطة الحكومة بتاعتها بند للحد من مشكلة الاطفال المعرضين للخطر .. واسمحوا لى اقول عليهم معرضين للخطر لانى مش هاقدر اقول اولاد الشوارع .. دول مش نتاج الشارع دول بنى ادمين ولاد ناس ..ولهم حق طبيعى فى البلد اللى عايشين فيها. بس الفرق هو ان خطة الحكومة بتستهدف ناس غيرهم مش اكتر.وعجبى

نقطة الرجوع

كنت ماشية النهاردة بالعربية و قابلت واحدة صحبتى من زمان ياةةةة" ازيك ..عاملة اية ؟؟ " "واحشتينى انتى فين يا بنتى؟؟" تعالى اوصلك انت رايحة فين ؟.. مروحة البيت ...اهنا اخر الشارع.. " اية دة انتى غيرتى شقتك ولا اية ؟" ....لا لا انا عايشة مع ماما بعد ما اطلقت..." بصيت لها بأستغراب !! اطلقتى!! لية يا بنتى اية الللى حصل ؟ ابدا ما استريحناش مع بعض .. "ايوة بس انتوا اتجوزتوا عن حب و قصص كدة...اية كلام فى كلام!! ردت و قالت " ابدا واللة احنا لسة بنحب بعض بس هو عايزنى اسيب الشغل رغم انة عارف من البداية انى بشتغل وبحب شغلى..بس ماعرفش اية اللى غيرة كدة.. المهم القصة اتطورت و طلبت الانفصال و طلقنى"... "طيب و انتى عاملة اية دلوقتى؟؟" قالت حاجة غريبة جدا ..رغم انها مروشة و انا عارفة ان ممكن يكون السبب حاجة تانية غير اللى قالت علية الا ان هى قالت كلمات جميلة قوى "مش مهم ان اكون مطلقة او متجوزة ..المهم ان يكون فى حياتى انسان بيمثل خط الرجعة..خط الدفاع او نقطة الرجوع او الحماية ..ممكن اعيش عادى جدا بس دايما بعملة اعتبار فى حياتى" وكملت وهى بتلفت عشان تنزل من العربية" مافيش حد بعيش من غير ما يغلط او حتى حد يغلط فى حقة......المهم هو نقطة الرجوع " يلا سلام مبسوطة انى شوفتك ..ابقى اتصلى بقى .....فسالتها " رقمك زى ما هو ؟؟ ردت وهى بتضحك وبتبعد عن العربية" طبعا زى ما هو.... مش بقولك نقطة الرجوع.
مشيت و انا بفكر فى اللى قالت علية ..فضلت فترة افكرة عشان افهم تقصد اية بجملتها الاخيرة
و مخبيش عليكم لسة بفكر لحد دلوقتى..حسيت قوى هى بتقصد اية بس مش عارفة اترجم دة لكلمات ..

بعد ما شاب ودوة الكتاب

اول ما ركبت المكيروباص النهاردة لفت انتباهى اتنين رجالة عمرهم بين الاربعين و الخمسين و كانوا عمالين بيتكلموا بصوت عالى و حوارهم كان ملفت للغاية لان السواق كان مشغل الكاست كالعادة طبعا و هما صوتهم برضوا كان اعلى من الكاست..و كان الكلام كالتالى:
الراجل الاول بيقول للتانى " بس بجد حركة بايخة من فاطمة و كريمة يعنى هو احنا مش زمايل لزمتوا اية انهم يخبوا علينا انهم مسافرين..خيـــــــــــابة " والتانى يرد علية" بس احنا هاننجح و هانرجع مجبروين ان شاء اللة .." بالك انت عبد المجيد سقط فى العربى و بيعيد تانى.. مش معقول "
والواد فراج بتاع الاعدادية الحديثة بردوا سقط فى العربى..اوعى تكون نسيت تجيب رقم الجلوس بتاعك ؟؟
لا متاخفش دا انا مجهز كل حاجة من بالليل ..و جايب كمان معاية شوية قراقيش عشان بين الفترتين نبقى نتسلى بيهم
عارف بقى كدة بعد احنا حقنا فى الترقية محفوظ بقى ومحدش هايخد الدور بتاعنا ..ايوة ما الكادر دة على قد ما هو تهزيق بس خلاص اللى هايمتحن هو اللى هايترقى"
واول ما سمعت كلمة السر "الكادر" كنت عايزة اضحك اضحك قوى بس اتكسفت ..مش معقولة دول مدرسين رايحين يمتحنوا الكادر ...بصيت كدة بطرف عينى عشان مايخدوش بالهم ,بجد دى مهزلة عمالين يقروا من ورق معاهم تقريبا زمايلهم اللى امتحنوا قبلهم ادوهم نموذج الامتحان. انا مش ضدد فكرة الكادر بس ماينفعش يا ناس ان نطبق منظومة تقييم الاداء من اخرها واجيب مدرسين عمرهم الدراسى توقف بعد ما اتخرجوا و اتعينوا و بعدين امتحنهم قال اية عشان نشوف ينفعوا يترقوا و تزيد مرتباتهم ولا لا!!
بصراحة الاتنين دول صعبوا عليا حسيت بالاهانة..قوى
بعتذر لكل مدرس كرامتة اتجرحت بسبب سياسة حافظين مش فاهمين