كلنا عارفين الحوار اللى مُحتل الصفحة الاولى فى كل الاخبار و الجرايد وبرامج التلفزيون " انفلوانزا الخنازير"...الناس فى مصر كلها والعالم بتتكلم علية ومخبيش حتى ان صديق كان مسافر ولما رجع كلمنى بيسلم عليا واثناء مكالمة التلفيون دى بردوا اتكلمنا على القصة دى!! والموضوع دة خلانى افتكر سنة 2006 وتحديدا شهر فبراير اول ماحصلت قصة انفلونزا الطيور, وصورة المزارع اللى اتحرقت لسة فكراها ,نفس الحوار بتاع الناس اللى خافت على الطيور اللى عندها وبقوا يخبوها تحت السرير ويهربوها من فوق سطوح البيوت!! ونفس السيناريو دة حاصل دلوقتى. سمعنا ان الحكومة عايزة تعدم او بالفعل اعدمت الخنازير بعد قرار مجلس الشعب بالاجماع على كدة. ولكن بردوا سمعنا ان الناس كانت بتهرب الخنازير من بلد لتانى بلد !!غريبة واللة !! حتى لو ان الخنازير مالهاش ذنب فى اللى بيحصل بس انا مستغربة من رد فعل الناس ..معقول ممكن نموت عشان خايفين على الخنازير او الطيور ..اعتقد ان احنا متميزين عن كل دول العالم بالتضحية دى ...وتحدى بس مش بتاع الغسيل ببرسيل..
ودة لان ناس بلدى عندهم الطير و الحيوان اغلى بكتير من البنى ادام!!ماتعرفوش دة جالهم منين ؟؟ ولية بقيت الحياة رخيصة قدام المادة كدة؟ ولان طبعا مافيش ثقة فى تصريحات الحكومة ومبقناش حاسين بأن وقت الخطر ممكن حكومتنا تخاف علينا ونثق فيها.. بقى كل واحد بيقول يارب نفسى
...كان فى حوار بينى ومع زميلى بيقول" تأثير ذبح الخنازير هايوصل كيلو اللحمة 100 جنية ....معقول يادى المصيبة..واية كمان الخسارة مش بس فى الاكل لكن الناس اللى هاتُصاب هنا فى مصر هايكون العلاج بالواسطة.. من الاخر كدة هايموتوا.. اما اللى هاتُصاب فى الدول الاجنبية هاتتعالج !!" منظمة الصحة العالمية بتقول محتاجين 100 يوم عشان انتاج المصل واختبارة..ناس بتفهم دة غير ثمنة اللى بقى...
وعشان المصل غالى جدا واحنا الحكومة بتاعتنا هاتعمل اية ..هايشتروا حبة مصل صغيرين يكفى للحبايب والباقى يموت حتى البلد تروق شوية وتبقى فاضية"
المهم اللى حاصل دلوقتى مش غريب كلنا متوقعينة لانة مكتوب فى الكتب السماوية عن نهاية الايام ودلالات قرب يوم القيامة ومنها انتشار الامراض والاوبئة وحروب وان هانسمع عن اخبار مجاعات فى دول العالم كلة .
فكرت بينى وبين نفسى طيب انا زعلانة لية من الموت لانة كدة كدة هايجى..وافتكرت لعبة زمان كانت فى مجلة ميكى.. وهى عبارة عن صفحة مرسوم فيها حوالى 50 حاجة بنستخدمها..والسؤال هو لوانت مسافر ولازم تاخد معاك 5 حاجات نختار اية من الــ50؟؟ يادى الحيرة يا ربى....
وبعدين عشان نخرج من الجو الغامق دة ...عايزة اقول لكم انى خايفة قوى على السمك لحسن يجيلة حاجة هو كمان ..ربنا يستر
1 comment:
أنا مش مقتنع بالموضوع ده أساسا من أوله ، كله لمصلحة شركات الأدوية ولأغراض سياسية أخرى دنيئة!
حتى المكسيك مش بتعاني من مشكلة ولا أي حاجة ، قعدوهم في البيت علشان يصدروا قانون بإعطاء الصفة القانونية لبعض أنواع المخدرات، والموضوع ده ما أخدش حقه في الميديا زي أنفلوانزا الخنازير.. ومصر أعدمت الخنازير جري بدون تفكير !
للأسف إحنا ننقل الأخبار ولا نصنعها!
Post a Comment