مشيها شورت

كان ياما كان في سالف العصر والأوان بلد تعبانه ناسها غلبانه وشقيانه اسمها مصر، ومن كتر ما خدنا على قفانا واتضربنا بالكف زي الدبانة، من ناس لا عندها رحمة ولا عندها ديانة، قام الشباب وثار لاهمهم قنابل ولا ضرب نار، اتظاهروا وكانوا أعظم ثوار، وعلشان الظلم كان مستحكم والظالم فاكر نفسه ياروح أمه بيتحكم وبإشارة منه يقتل واللي يضايقه يتسحل ويتلجم … قالك اقطعوا عنهم التليفون والنت واضربوا ومتفرقوش بين واد ولا بت، اللي ينزل الشارع اعموه من الضرب وخلوا الدبان الأزرق لا يعرفله طريق ولا درب، وعلشان الشعب ده كان مبقوق وكان من الحركات دي مفتوووق، قرر يتحرر من الخوف ويخلي اللي ظلمه يشوف إن الشعب ده لما يثور على أي بهيم راح يخليه يلف في ساقية ونكتب بادينا الدستور.

دي كانت قصتنا اللي لسه بتتكتب واللي افتكرتها أول ما قريت خبر بيقول:

إن بريطانيا تبحث إمكانية تعطيل شبكات التواصل الاجتماعي وخدمات الرسائل عبر الإنترنت مثل خدمات رسائل بلاك بيري وموقع تويتر خلال أوقات الاضطرابات. وكانت الشرطة قد قالت أن مثيري الشغب استخدموا شبكات التواصل الاجتماعي في التنسيق لعمليات نهب خلال الاضطرابات التي اجتاحت انجلترا هذا الاسبوع. وقال المصدر "نعلم أنه تم استخدام هذه الخدمات .. والسؤال هو هل يمكن فعل شيء لتعطيل ذلك على نحو يعالج هذه المشاكل؟".

زمان عمري ما سمعت غير جملة في أوروبا والدول المتقدمة بيعملوا كذا وكذا وكذا … أخيرا جه اليوم اللي الشعب المصري علم العالم كله واداله درس "كيف تقوم بالثورة بدون انترنت وفيس بوك وتويتر".

بس هل تعتقد بعد الثورة الفظيعة، آخر حاجة، واللي العالم كله بيتعلم منها ـ ده حتى الشعب الإسرائيلي بيقلدنا ـ هل اللي بيحصل الفترة دي من برشته من جماعات منظمة وأحزاب بنت ستين بوبى وناس لا عمرنا شفناهم في الثورة أصلا وكانوا رافضين أصلا المشاركة فيها باعتبار إنه عيب وكخه .. هل هتستمر ثورتنا في تعليم العالم أصول التظاهر والثورة؟.

أتمنى أن يضع الجميع صورة مصر العظيمة أمام عينه ونرى كيف يرانا العالم الآن .. طبعا البقين دول ولا هيأثروا في السادة أعضاء حزب البراشوت لأن حزب البراشوت ميهمهوش صورة مصر .. حزب البراشوت ميهمهوش مصر لابسه قدام الناس بدله أو ك.. ت (مشيها شورت).