لمدة اربعة اعوام وانا من رواد مكتبة المعهدالبريطانى بالقاهرة, الفكرة بدأت بعد ما انتهيت من دراستى فى كلية التربية الفنية وبدأت رحلة العمل اللى طبعا كانت مختلفة تمام عن مجال دراستى اللى انا بحبة و كنت شاطرة فية قوى قوى ...وقررت ان الفن يكون هواية و ليست مهنة عشان انت اكيد فى مصر. المهم ولانى من سكان الاقاليم..وكمان بدات اشتغل فى هذا الاقليم !!كان لازم ادور على خيط يربطنى بالمدنيةو يقربنى من فرصة حضورى لمعارض و الاحداث الفنية.البداية كانت فى الجامعة الامريكية و استمرت لمدة سنة .وفى الاثناء دى بدأت رحلتة مع مكتبة المعهد البريطانى..ونشات بينى و بينها علاقة جميلة جدا..المكان المناسب انى اشوف العالم الكبير من مجموعات لكتب كتير و شرايط ومواد علمية وكمان الانترنيت. وفرصة الاحتكاك بثقافات مختلفة...وعلى فكرة انا اول مرة دفعت فيها قيمة عضوية المكتبة كنت استلفت الفلوس عشان كنت بنزل القاهرة مرة واحدة بس فى الاجازة الاسبوعية بتاعتى....وفضلت العلاقة مستقرة لحد ما جاء اليوم الغريب اللى انا دخلت فية المكتبة و لقيت فى اعلان غريب عن حق الاعضاء فى استرداد المتبقى من قيمة العضوية!!!!سالت المسئولة اللى فى المكتبة ..هو انتوا بتغيروا فى نظام المكتبة ولا اية؟؟ ردت وقالت لا..احنا ها نغلق المكتبة!! قلت لها ..شوية الصيانة بتوع كل سنة دول؟؟ قالت ..لا هانغلق خالص!!!قلتلها لية..قالت اصل احنا عملنا بحث ولقينا ان اعداد المترددين على المكتبة قليلة فوى فا هنتبرع بالكتب للمكتبات العامة !! واخر يوم للمكتبة هو 20 اغسطس عشان تاخدى اللى باقى من فلوسك!! طيب ما تغيروا من انشطة المكتبة ..اقصد نشوف اية اللى ممكن يتعمل بس بلاش الغلق دة!! قالت لى و بكل هدوء شايفة الصندوق اللى هناك دة...دة صندوق المقترحات اكتبى فية اللى انت عايزة تقولية...ادارة المركز يهمها تعرف راى الناس اية.
مشيت لحد الصندوق وسحب ورقة وكتب عليها..مش فاكرة قلت اية..بس اللى انا فاكراها هى صورة المكتبة و الكتب ..ةالصالة الكبيرة اللى فيها الاستقبال و على اليمين فى قسم اللغات و على الشمال تطلع ثلاث سلالم و تدخل الصالة بتاعت الكمبيوتر و منها على اليمين قسم الكتب الادارية ونظم المعلومات و على الشمال القسم الادبى والقصص وعلى طول تنزل درجتين هتلاقى صالة القراءة فيها كراسة وترابيزات. اما الكتب المتنوعة فا هتلاقيها من بعد الاستقبال تمشى على طول وبردوا فيها كراسى بكل الالوان وممكن تسمع ميوزك فى الصالة دى كمان...لوعايز كوفى اوشاى هايكون على ايدك الشمال من بعد صالة الاستقبال. عايزة اعتذر لادارة المركز عن الجهد اللى بذلوة فى اضافة اللمسة الثقافية دى واقول لهم نحن شعب غاب عن عينية الطريق وعجز قلبة عن قراءة الكلمات..نحن شعب بسيط مسطح يكتفى بقراءة الحبر على الصفحات...نحن شعب المجلات الملونة و اخبار الفنانين و الفنانات
..وابكى المكتبة بجدرانها التى كانت مليئة ....اصبحت هاوية لا يسكنها الا اصداء الاصوات
1 comment:
ma3lesh :)
Post a Comment