فى حياة كل واحد فينا موقف فاصل بيكون فية قرار معين ممكن يغير مسار حياتك من الالف الى الياء...ممكن يكون موقف كبير او صغير...بس المهم ان حياتك بتختلف تماما !!!
بسبب قطة بدأت حياتى تنتقل من مكان الى مكان اخر ...دة بجد حقيقى مش تهريج. لان القطة دى كانت قطة المديرة ..يعنى مش قطة اى كلام ..دة قطة مديرة بنت مديرة.....انا فى الاصل بحب القطط بس ماما كانت رافضة وجود قطط فى البيت لانها مش بتحبهم ...وانا فى ابتدائى ..فى حد من اصحابنا جاب لى قطة فى عيد ميلادى وكنت بحبة قوى..وكان عارف مواعيدى وامتى بصحى وامتى برجع من المدرسة..كان عامل زى خيالى ودايما معايا...وفى مرة من المرات سافرنا وكان سفر طويل وسبت القطة بتاعتى عن ناس عندهم قطة عشان يخلو بالهم منة عقبال ما ارجع من السفر...ودى كانت اخر مرة شوفت فيها قطتى ,لان لما رجعنا الناس قالولنا"احنا اسفين قوى القطة بتاعتكم زعلت مع القطة بتاعتنا وفى فجأ نط من فوق سور البلكونة للشارع ومات!!!"طبعا كان بالنسبة لى موقف زى الزفت وعملت مناحة...وبالنسبة لماما كان يوم الهنا طبعا.
..ومرت الايام وطبعا لاغيت من حياتى فكرة ان يكون عندى قطة...لحد من سنة تقريبا..لما مديرتى كانت مسافرة لمدة شهر تقريبا ومافيش حد يخلى بالة من القطة بتاعتها,وقبلت المهمة طبعا بكل انبساط....واصبحت العلاقة بينى وبين مديرتى اتطورت, وكانت هى السبب فى ناجاحات كتيرة قوى فى حياتى بدايتها...... قطة!!!!!
والموضوع ما انتهاش عند الحد دة بس دى كانت الخطوة الاولى فى قصتى
انا عارفة ان كتير من اخواتنا اللى مش بيحبوا القطط او شايفين ان تربية الحيوان هو من الافراط اللى مالوش لازمة لان فى اطفال بتنام فى الشوارع ومش لاقية تاكل !!هما اولى بالرعاية...طبعا انا بحترم وجة نظرهم بس بختلف معاهم فى ان لا مقارنة بين الحيوان والانسان...لان ببساطة مافيش قاعدة بتنهى ان الانسان يعتنى بالحيوان مثلا . لان الحيوان كتير قوى بيكون اوفى واصدق من الانسان!!!
No comments:
Post a Comment